In piaza xe borin,
me son sveià bonora,
man man che passa el tempo
se alzerà forte la bora…
Bora dela note
scura
che fa paura
Bora del babau
nera
che vien de sera
In giro per Trieste,
la me porterà
parlar co la gente patoca
de ‘sta granda zità
Bora dei boschi
verde,
ma i rami se spaca
co la taca….
Una bela spazolada
del Carso a Miramar
la riva fin San Giusto
i nuvoli a spostar.
Bora de mar
blu
e le vele se movi
de più…
…E quando in Ponterosso
le bancarelle colorade
con tante venderigole
vigniva sbatociade
Bora del tramonto
rossa
che te ciapa el fià…
e la te ingossa
El mar coi sui colori
le onde contro i scoi
do muli che camina
finissi slavazai…
Bora del sol
giala
xe tuto seren
xe la bora
de l’arcobalen.
Che teneri che i xe
i se tien streti la man
ma ‘sto vento no perdona
ribalta anca i tram
bora de putele
delicata
e rosa
come i fiori dela sposa
De Opcina xe quel
Co’ la bora che cantemo
che ga solo el frenador
intanto che tuti laveremo…
Bora del Carso
color piera
per i campi la cori
e come la passa
la cambia i colori
El Carso fa figura
con alberi e cespugli
xe tuto dentro un quadro:
ottobre, foie rosse
par proprio piturado.
Bora de Miramar
bianca
candida come'l castel
sufia tanto
ma che bel…
Xe tante canzonete
bone per far festa
se canta volentieri
“La bora” e “marinaresca”…
Bora de San Giusto
maron,
che tuto el golfo
la controla
e mai no lo mola
Girando co la bora
te rivi in val Rosandra
lì tuto va pian pian
e anca le cascate,
te ciolerà la man…
Bora del tram
arancio,
trabalante,
che ogni tanto, no so perché
el va fora dei binari
anca se no la xe!
Te pol anca fermarte
Trieste no ga furia
intorno sta a vardarte
el spetacolo dela natura.
Bora de piaza Unità
azuro
xe sempre sta
bel tempo o bruto,
che la vadi forte o pian,
con Mikeze e Jakeze
la ne da una man…
bora del faro
grigia
che su e zo la va’,
per farghe de guardia
a tuta la zità…
e dopo el molo Audace
la bora te saluda
la va de novo in tana
sora del municipio…
Ma come no savevi??
la guardia la fa là
insieme a Mikeze Jakeze
su
piaza Unità…
bora mia,
color che volè voi,
color de fantasia,
ma color dei fioi…