emozioni in quota

i silenzi in zima
i rumori dei silenzi
pensando ai colori
sognando sorisi
zogarse
come se'ltempo
gavessi messo
la retromarc


ia

basta poco...

Distuda la luce
impiza i sogni
che basta quei
per iluminar
la prossima alba...

per storto...

El mondo ala riversa...
I fioi paga un prezo
tropo alto
per le cazade dei grandi...
E i grandi dovessi cominciar
a no far come i fioi...

aquiloni

Xe nela nebia
Che se perdi
Zerti pensieri
Xe co' la bora
Che se rodola
I desideri
E l'ultimo sufion
Sburta via storie
In sconton
Carezando'l sogno
de un muleto
che cori e zuca
Un aquilon...

Assieme

Rodolando assieme...

Spunta spesso
fra le righe
Sorprese e sogni
A volte realizarli
Per voltar pagina
Xe come rileger
Storie za' scrite
Tociando'l penel
Nela fantasia...

Bon vento

Bordisando
fra i colori
dele vele
Refoli de bora
che se 'scondi
Come fioi
che zoga
E rente'l molo
sbisiga la gente
Sveia la zita'
Ciacole e concerto
de rumori
de barche che sbatocia
Come un sogno
che torna indrio
Oci e sorprese
ogni volta
Tufandose nel mar
vestido a festa...
Trieste xe poesia
Trieste sotosora
Trieste che 'speta
la sua bora

Mona

El problema xe che
de solito'l mona
no sa de esserlo...
E co' te ghe disi
no'l capissi...

Tornar casa

La bora xe tornada casa...
E tuto par aposto
Tuto xe normale
Svola straze
Ribalta scovazoni
Sbatocia motorini
La fa confusion
La te impiza le idee
Girado'l canton
Refoli a sorpresa
Che te par un stramuson
Ela xe cussi
Ciapila strenta
E tiente forte
La te sburtera' sui nuvoli
Che te la iuti
A sburtarli via
Che torni'l seren...

Trieste sotosora (4)

Leger ogni volta poesie nove
'scoltando Trieste...
Scriver emozioni 
vardando le sue storie, timide 
che ingruma refoli de fantasia...

Trieste sotosora (3)

Svisade de vento
sufioni che svirgola
fra i teti
'pena che la luna
se scambia col sol
refoli ziga spavaldi
par de sentirli rider
e timida riva la bora
a mostrar
ribaltoni e remitur...
Nel ziel svola de tuto
girandola de scovaze
un missiot
che rivolta la zita'...
Bora che intriga
e fa casoto

Trieste la 'scolta
e se cambia'l vestito
ogni volta sveiarse
col suo fis'cio
'ncora lontan
e farse cior per man...
La riva!

Trieste sotosora (2)

Vardarte co'i oci dei fioi
sorpresa drio ogni canton
Brila'l mar soto'l sol
E 'pena riva scuro
se impiza i ricordi
Soto un feral
a tignirse
sburta la bora
E 'scoltar una canzon
Xe "Trieste sotosora"...

Trieste sotosora (1)

La mia isola che no xe...

Zogando co'i colori

riflessi in zita'

Trieste ne conta

fiaba e realtà...

Sentarse a 'scoltar

in gropa al molo

col rumor del mar

vardo le stele e svolo...

un soriso

Un soriso 
no se inventa
se regala
Un soriso 
no se 'scondi
se mostra
Un soriso
no ga' prezo
per quel xe gratis
Un soriso
no xe un diamante
ma dentro de ti
pol valer ancora de più
Per sempre...

zavatando

Ingrumando pensieri
zavatar per la zita'
Le robe de ieri
el tempo ga' cambia'
Se me sburto sora'l mar
de lontan el faro
per vardar
lu' me fa ciaro
Ma in sconton
rente la piaza
rivo zito a cucar
Sero i oci
e la' in fondo
sento vosi ricordar...




"Mi fazevo
Mi disevo
Una volta iera meo"
E de boto nuvoloni
Cossa brontola
anca lori...
Quel che iera
ormai xe sta
Ricordarlo
xe la storia
meo pensar
quel che sara'!

zogando...

El zitolo zotolo
xe l'unico posto
dove chi sta' in basso
pol decider el futuro
de chi sta in alto...

bus...

E come sul bus...
Rivar al capolinea 
pol esser un punto de partenza...

dedica...

Nel condominio

xe un'istituzion
la siora che cuca
drio'l canton
Tante storie
ela controla
la xe de vedeta
le rece tirade
come antene
sintonizade
No ghe scampa
nissun babezo

Ela te grampa
ogni monada
Fa finta de niente
se te la vardi
ma la ciol nota
fin de sera tardi
Senza de ela
proprio no se pol
po' te ghe vol ben
anche se no te vol
E chi no la ga'
xe solo perché
in realta ela xe
ma lui ncora no'l sa...

calor

Si!

Come una putela
che te schiza de ocio
e la scampa drio'l canton
Trieste timida e silenziosa
che sveia sempre un'emozion...

ragi

le robe in ombra
spesso ga'l sol
dentro de lore

bora

Bora che
ciacola rugna brontola
Bora che
scovercia ribalta spifera
Bora che 
sufia smovi sbalota

E noi 'scoltar

e scriver quel che la disi
Xe sognar a oci verti
Xe farse cior per man
dei sui refoli
Perché la bora xe poesia...

Scriver in quota

Trieste scontrosa
Trieste che varda
Trieste che se movi
Anche se no se pol
Trieste che vivi
Trieste che ricorda
Trieste che 'conta
Per 'ndar 'vanti col cuor
Trieste amica
Trieste lontana
Trieste dentro l'anima
A spasso come i fioi
Trieste speranze
Trieste i nostri veci
Trieste i giovani
Volendo se pol
Trieste semo noi...

pensemoghe...

La mia generazion xe cressuda 
con tre civete che tromba sul como' 
co' la fia de un dotor 
senza 'corzerse che Paperino
gira senza braghe...

boh

penelade de sol...

caro Ponterosso...

Tra mar e zità
ghe xe'l canal
con tante barchete
che sta là vardar

Te passi e nel’acqua
scovaze in amolo
che fora volessi
saltarte sul colo

Marea che se alza
E tute le barche
no pol ‘ndar al largo
le fa compagnia
a quele scovaze
che no voleria

La piaza una volta
co le bancarele
de le venderigole
za' co le stele

Le riva bonora
ma no le xe più
xe tanti parchegi
co le striche blu

I pessi se sofiga
lori no pol più
in quel canal
no se nuda più

"noi sul ponte curto
no podemo 'ndar
e le rane 'desso
ne vol sfratar"

Caro Ponterosso
me sposto più in fora
vado là del molo
a farme pescar
che almeno là
se pol respirar...

indrio nel futuro

vardando'l mar
no te scolti'l vento
scoltando un temporal
no te vedi il tempo
che scori soto i oci
che'l te scampa
e quando'l se inacorzi
el te grampa
e lassite becar
che in mezo ai sogni
sempre te pol sperar
novi colori
che i vegni a ingrumar
riflessi e fiori
che mai dimentica'
in zima al cole
e zo' fin miramar
sufiando bole
e anca quel morbin
xe 'ndado 'vanti
el iera picinin
per tuti quanti
cressudi xe quei muli
che ciapai per man
sognava verti i oci
basandose pian pian

ocio

Sughite ben
se del’acqua
te vien fora
e no butarte
se te ga magnà
de un’ora

xe onde
sta ‘tento
a no finir sui scoi
no star ‘ssai in acqua
che tropo
te se smoi

no becar tropo sol
tien la maia se te pol

bereto in testa
e un fià de crema
no scalmanarte
che te vien l’eczema

se te ciol gelato
pian che xe iazado
ma se te ralenti
el finissi squaiado

oltre le boe no sta ‘ndar
che no se toca
e te se pol negar

la prossima volta
niente mar
e se mama me scolta
casa el pranzo magno
e po’ el tufo
lo fazo
in vasca de bagno

latin...

Verba volant...
A Trieste co' la bora
volant ancora de più...

e beh!

Se te ga' dormi' col cul scoverto
o te se ga' alza' col pie sbaglia'...
Almeno zerca de no dormir in pie..

portando i nuvoli in zima

Silenzi che sburta
Man che se grampa
Voia de sognar
El ziel scrivi tuto
E 'tanto che'l sol scalda
Pici passi colora 'torno
E lontan come una fiaba
I monti ciama
E ricordi de muleto
Se volta indrio
Verso'l doman...

in volo

La fantasia xe un aquilon

che svola anca senza vento

Trieste xe!

Bora poesia

e Pedocin

Piaza Granda

Miramar

tanto morbin

Carso
Muja
Ponterosso che te varda
El faro de lassu'
per impizarla

Osmize
molo Audace
nuvoli in feriera
San Giusto
muleria matina e sera

Ponte curto
Barcola
e la' un veceto
che'l te conta dela vita
ma in dialeto

Porto piccolo
el parco Revoltella
Saba, Joyce e Svevo
statue la' de guardia
su una stela

Tramonti
el fia te ciapa
per vardarla
Trieste un emozion
basta imaginarla

E quei cantoni
che go' dimentica'
con Mikeze e Jakeze
va zercarli
po' te me contera'...

(Vardando Trieste)

vardo...

Sentarse su una panchina 
vardar in silenzio 
quel che ne sucedi intorno
Cior un foglio bianco e una pena
El resto xe atimi e parole
Poesia de osservar..

Foresti...

CONSIGLI PER FORESTI

El patoco triestin

tante volte go' pensado

che tradoto in italian

forsi ben no vien capido

te ga de bagnar le piante
'lora ciol el SBRUFADOR
che par una parolaza
INNAFFIATOIO per tradur

sera presto quela porta
no sul vetro quele man
xe la CLUCA per doprar
ma te ga' de interpretar
che no la finimo più
sera ben co' la MANIGLIA (MANIZA)
gira l'aria alo su
riva spuza dela griglia

ghe xe anca la canzon
che ne parla del PITER
ma te devi 'star 'ssai 'tento
dentro cossa che te meti
che xe un VASO no de note
ma per meter qualche fior
e sicuro no va drento
quela roba che ga odor

sempre ghe volessi rider
GRIZOLI podemo far
po' dipendi in che loghi
se metemo a grizolar
e alora tuti 'tenti
che'l SOLLETICO fa ben
per esempio dentro in ciesa
son sicuro no convien

ciolme dei le mie PAPUZE
ghe go' dito a un foresto
lo go visto spaesado
forsi lù no'l gà capido
che volevo le CIABATTE
e ZAVATE in triestin
se te piasi se pol dir
tanto vado sul divano
che go' voia de dormir

e rivemo al CAPO IN B
qua savemo cossa xe
ma chi riva prima volta
e vol beverse'l cafè
devi prima imparar
come 'ndarlo a ordinar
un MACCHIATO NEL BICCHIERE
ma co' capita'l contrario
el patoco triestin
fora casa a ordinar
spesso capita de dir
la me daghi 4 NERI
no extracomunitari
La me fazi un CAPUCINO
abituadi come semo
a una picia scudela
e inveze a sorpresa
i te conza la mastela...

gianpacco

(Vardo-2015)

gioventù...

I giovani va incoragiadi, seguidi, entusiasmadi
Se no te gà capido questo
forsi no te ieri mai giovane

semplicemente

xe le robe semplici 
che impinissi i cuori semplici
xe dai cuori semplici 
che nassi grandi robe

Ricordi...

Un tufo a oci verti
nei ricordi de trieste
che soloì'l mar sa
co' piaza Grande
se rodola
sui ragi delv sol
te pol sognar con lori

Speciando

 

El penel tocià nei sogni

col tramonto a realizarli

e Trieste

se specia nel suo mar...

Si

Trieste ogni volta una sorpresa...

strafanici

STRAFANICI SE NASSI
O SE DIVENTA ?

STRAFANICI NEL CUOR
DE 'STA GRANDA ZITA'
PINDOLANDOSE SU E ZO'
RENTE PONTEROSSO
SCRITO E PITURA'...
SENZA DE LORI
NO SE POL FAR
XE ZIGALONI
CHE SA SOGNAR...

L'ANIMA VERA DE TRIESTE
PATOCA LA XE
SGIONFA DE POESIA
COLORANDO'L MAR...
SORA I NUVOLI
I PENSIERI SVOLA
SALTANDO I SCOI
FIN MIRAMAR...
SVEIANDO DAL MOLO
TUTA PIAZA GRANDE
COL MORBIN
QUANDO RENTE'L CARSO
SE DISMISSIA
ANCA'L BORIN...

te par...

e te par
che la fanatsia
se gà fermado qua

ciuff

sempre...

...E pò
verzer i oci
e 'ndar 'vanti a sognar

Quando Trieste

Quando Trieste
se lassa scriver
Ogni suo canton
se meti in mostra
Ogni mossa
ela te fa viver
Sognando'l mar
e sempre a sorider
Che forsi co' la bora
una bela spazolada
E rente piaza Grande
corer senza pensar
Colori dela sera
pronta per sognar...

e via...

Una penelada nei ricordi...
Parole e imagini
per sognar...
Come i fioi:
pronti a scoprir
el mondo...
Entusiasmarse
dei giorni
Sorider...per zogar.

sssshhhh

co'l silenzio ciama

no 'cori parlar

basta vardarlo

in zima...

A ti...

alè...