31 dicembre 2017

Trieste sotosora

E vardarte co'i oci dei fioi
sorpresa drio ogni canton,
brila'l mar soto'l sol
ridi'l ziel: si se pol!
'Pena riva scuro
se impiza ricordi:
soto un feral 
a tignirse per man
co' sburta la bora,
mai dismentigar
e sora 'sto mar
se sogna 'ncora.
Po corendo su e zo'
de matina bonora
'scoltar una canzon

xe "Trieste sotosora"...

Trieste elegante


Trieste elegante
sa farte sognar
in zima al molo
sburta pensieri,
i sorisi dei veci,
le storie de ieri.
E nel doman
el suo mar se specia,
dispetinada dei refoli
una putela mai vecia.
Ciacola Trieste,
e te par che'l giorno
missia' co' la note
sburti pensieri
a brazeto come ieri,
inverigolando emozioni
sora i colori dela fantasia.
Trieste nel doman,
Trieste xe magia!

Ciacolade

co' Trieste ciacola 
soto le stele
starla scoltar in zito
nel silenzio dela note
co' l'ultimo pensier
xe ndà in paion
e squasi soto'l cussin
salta fora un sogno
saltarghe in spala
e rodolar 'vanti
fin che'l primo ciaro
dismissia la zità
e ncora nele rece
col remnitur del giorno
quele ciacole
zoga nasccondin

                  co' i nostri desideri

Si,se pol

Si, se pol!
Son sta contagiado dal virus del basket de picio: l'antidoto? el teatro (e go' parlà de basket anche sul palco, ma quela xe un'altra storia)
Perchè a Trieste el basket xe passion,
perchè el grizolo del ciuff te se lo porti zà de muleto,
perchè l'entusiasmo de un publico competente no xe un caso,
perchè meterse in fila per cior el biglieto fa parte del riscaldamento (el ticket point iera de boio: se podeva butar la pasta...)
perchè la squadra ghe sta credendo sul campo,
perchè le provocazioni fa parte del zogo e sceglier de ignorarle xe de chi vol 'ndar 'vanti a zogar
perchè i conti se fa ala fine ma la festa xe sentir zà 'desso nel'aria tuto un buligar,
perchè se veramente no'i gradissi Trieste in finale vol dir che i gà paura e i se farà una ragion...
perchè ai fioi che se avicina al basket ghe vol contarghe dei anni passai e i gà de veder un spetacolo anche sule tribune,
perchè ai fioi bisogna spiegarghe che'l tifo e la passion gà un limite e se te lo superi se ciama altrimenti,
perchè xe da chi scendi in campo che devi rivar l'esempio ma "sperar che'l mona capissi xe come sperar che'l caval a dondolo tachi corer"
Perchè i aversari fa parte del zogo, come i arbitri, parlar de lori xe una perdita de tempo, meo far tifo per Trieste
perchè l'Alma xe in grado de vinzer senza spudoni e sburtade
perchè i zogadori che zerca spesso la rissa gà sbaglià sport o xe inferiori
perchè la psicologia dei playoff e la pre-tatica verbale no xe bombe de tre, ma ciacole
perchè semo quei del viva l'A-lma e po bon ma (cazzo) volemo 'ndar su
perchè so che l'Alma se in casa i zoga in sei, fora i se porta el sesto omo in cuor
Perchè i cori e le coreografie dela muleria merita un aplauso a parte: xe creazioni artistiche
perchè credo ancora nel basket neto e puro
perchè credo nel sogno de una zità intiera,
perchè i canestri e le vitorie se conquista ancora sul campo e il contorno "contro" no pol cambiar i risultati
perchè Rich Laurel, Boscia & c. xe l'indimenticabile de ieri, questi xe i biancorossi del domani.
perchè come diseva el mio coach Tullio Micol: chi gà dito che l'importante xe partecipar, che partecipi i altri , mi voio vinzer
perchè a noi no ne manca la fantasia
perchè el tifo creativo me gà sempre divertì
perchè una volta de picio che iero a Chiarbola con papà, un aversario (che no ciamo tifoso per no ofender i veri tifosi) gà dito "son contento de gaver vinto per quele merde de triestini" e papà ghe gà risposto "la ghe daghi un cuk perchè anche quà che la xe sentà lei sento una bela spuza de merda..."
Per tuto questo e anche per altro si, se pol!

prima e dopo

prima te meti el dentin soto el cussin
dopo te meti la dentiera sul comodin
prima alem ule drio xe de ndarghe
dopo el de drio star a vardarghe
prima lontan col canocial a cucar
do

po sui ociai
del cnaocial le lenti montar
prima in moto col casco viagiar
dopo xe za ssai
se fazendo moto
te rivi a no cascar
prima el posto in bus
ai anziani lassarghe
dopo se i te lo lassa a ti zigarghe
prima al pedocin
dela parte dele done boce zogando
dopo reparto omini
boce dele done vardando
ogni età gà el suo perchè
prima no te lo sa

dopo no te se lo ricordi

mama

in zito scoltar el sbater de ale
cocai che se inzingana
per un toco de pan duro
srodolar ricordi
come un film
e po serar i oci
sveiarse de muleto
fra i schizi dele onde
per imparar galegiar
mover i pie
farse tociar de mama
e un ventisel

careza i sogni

Stele

Le zime te varda
e par squasi zucarte pel copin
co l'ultimo sol se 'scondi
drio de lore
co se scuminzia veder la luna
per iutarte
per moverse
che'l scuro
ilumina el sentiero
ma le stele
xe meo starle vardar
dela finestra

16 giugno 2017

smile

la semplicità di un sorriso
si legge negli occhi
di chi lo riceve

Spigolando

Prima e...dopo

Prima te meti'l dentin 
soto'l cussin
dopo te meti la dentiera 
sul comodin...
Prima ale mule
drio xe de 'ndarghe
dopo el de drio
star a vardarghe...
Prima lontan
col canocial a cucar
dopo sui ociai
del canocial le lenti, montar...
Prima in moto
col casco viagiar
dopo xe zà 'ssai
se 'fazendo moto te rivi a no cascar...
Prima el posto in bus
ai anziani lassarghe
dopo se i te lo lassa a ti
zigarghe...
Prima al Pedocin
dela parte dele done boce zogando
dopo reparto omini
boce dele done vardando
Ogni età gà el suo perchè:
prima no te lo sa
dopo no te se lo ricordi