??

Paperino

Se ziga'l scandalo
per tante monade
senza 'corzerse
che Paperino
gira senza mudande...

40

Per no dimenticar
Solo'l pensier de 40 anni fa...
Solo l'esempio de chi ga' savu' ricostruir...
Tuto'l resto xe ciacole...


6 maggio 76 - 6 maggio 2016

sincera...

La vera amicizia no ga' bisogno 
de trope risposte 
e gnanca de tante domande

gratis

...e pensar che rider, 
saludar e ringraziar 
xe cussi' facile...
e xe anche gratis...

fb

feisbuk xe come
un pianerotolo
con tanti cukerle

consigli per gli acquisti

Go' visto che nela publicita' de un deodorante 
per dimostrar che'l funziona 
i se basa le ascele...
Per la carta igienica ve credo sula parola!

sogni

sogni come le aiuole
guai calpestarli

se...

se te ghe credi
se pol!

eh già!

La mama dei cretini
no ciol precauzioni

per...

Per sentirse fioi
no 'cori nissun 
parecio acustico...
Per 'scoltar certi adulti
meo i tapi...

scriverlo

Chi no lo vedi
no pol saver
Ma chi lo ga' dentro
sa che basta starlo a vardar
Per po' scriverlo e sognar
El mar...

colori

Emozioni in cornise
silenzi coloradi
'scondariole de poesia

el segno de Dino

Femo bala a chi segna, uno contro uno...
Son un fiatin impaziente che te speto al campeto del ricre e te vedo rivar de lontan co' la tua andatura imponente, 203 cm. de grinta...
I muscoli i xe, ma zogar con ti credo che xe come sentirse in una bala de fien: protetti, soto canestro e anche fora del'area...te ga' un borson a tracola, jeans e maieta e le manone bele grandi..el solito soriso, pronto a scherzar con tuti...e a dar pache sule spale , povero chi le ciapava
Iera tanti ani che no te incontravo: de quando te ne ga' premiado nell'ex Yugoslavia per la vitoria a un torneo giovanile, te ieri con Rubini (che merita un raconto a parte)...e iera se no sbaglio el 1979...te ieri all'apice dela tua splendida cariera...e quanta roba 'ncora te dovevi scriver sul campo...sempre la batuda pronta...me ricordo che te gà squadrado un per un tuta la mia squadra anche el coach...e in ultimo te gà ciolto in brazo el nostro dirigente acompagnator che te rivava praticamente al bunigolo e te gà escalmado: “deghe de magnar a 'sto omo, che'l cressi, no'l pol miga star sempre in panca”...
Te pari ben el dialeto veneto: le tue origini iera quele...
Se rivedemo per 'sta sfida: poderò dir de gaver fato un percorso uguale del tuo, ma no nel basket a scola...te son geometra.
E intanto che la tua figura comincia farse sempre più grande man man che te me vien incontro, me ricordo quel'Italia – Yugoslavia che xe vignù fora longhi e te ghe ga' corso drio a Kicanovic fin sule tribune...pareva el circo
E de no dimenticar che nela nostra Trieste te ga concluso la tua cariera a 40 e più ani, dopo esser stado el zogador italian più forte e rapresentativo de sempre...
Un come Dino no se inventa: praticamente tuti conferma che con un cussì in squadra te gà el classico valor agiunto, lui fazeva spogliatoio, panchina, campo, alenador in campo, e forsi ghe dava anche una netada ale doce dopo i alenamenti chissà...e no per niente el gà acompagnado la squadra azura in varie spedizioni olimpiche mondiali ed europee: ulteriori anedoti del mio amico Pozzecco che lo gà avudo come dirigente magari conterò in altra ocasion
Ghe semo quasi, te son rivà col tuo 48 de pie te go vizzin...te me bati un cinque, robe che me ribalto, “ndemo cambiarse” te me disi co' la tua vose inimitabile...e el tuo profilo greco
Te vardo, sorido contento...semo subito in spogliatoio....e se metemo indosso braghete e canotiera...ti el numero 8 (il mio) e mi l'11 (el tuo) che emozion...te se bagni i cavei, una tua abitudine che te se porti drio dale giovanili de Varese...inutile dir che mi no me bagno niente
Una fassada ale caviglie...i tui imancabili polsini bianchi...un bel mikasa arancion, (per chi no xe del ramo, no xe un aperitivo, ma el balon a spichi)...
Un signor del canestro...te me lassi la prima bala a mi...e mi parto in quarta...per 'ndar segnar
”ouhhhh...cossa te fa...toso?”...no capisso...
”e cossa te pensavi che te regalavo la prima bala?” Dino scoppia a ridere...
”ara che la prima bala la ga chi segna de metà campo....”
secondo voi come xe 'ndada..? bon sorvolemo...
Dino fa la prima entrata...e me piazo sula sua traietoria...ma quando el me riva indosso co'i sui 110 chili...no gò gnanca el tempo de zigar fallo de sfondamento...che finisso distirado de schena...come indormenzado...intontido
sento una vose lontana...”sveite...'ndemo dei... sveite...xe le sete...xe ora de 'ndar lavorar...” …
Ma no iera Dino, iera mia moglie, che no xe grande e grossa come Dino...ma la grinta no ghe manca, specie co' no sento la sveia...
”ma cossa go' sognado? Pareva vero...”
e tirandome su la maieta me 'corzo che go' anche segni rossi sul peto (varicela gavevo zà)...e 'lora ghe digo a mia moglie : “ara ara...xe el segno de Dino”
“tandul...xe l'orticaria...te se ga incoconà de fragole”


Gianpacco - Ciuff: emozioni a canestro 2012

quei due

Trieste ga' tanto de 'contar
Mikeze e Jakeze pol cominciar
Che de la sora tuto i se 'corzi
Che de la sora i sta vardar
E co' taca'l sogno del triestin
I se cala zo' portar morbin...

gianpacco ("cossa dira' quei due?")

Muleta

Per sognar
Per imaginar
Per volerghe ben
Verzendo i oci
Squasi no te par vero
Xe la semplicita'
De sorprenderse
Con poco
Come i fioi
Come la mia zita'
Cressuda
Senza che te se inacorzi
Epur sempre muleta...

diseme

Quei che no ridi per monade
Cossa fa co' le robe xe serie?