Su per quei scalini
corevo de picio
intanto che nona
ingrumava radicio
“No due ala volta,
te se intoperà”
la me zigava
ma iero zà cascà
E rente la casa
vizzin del boscheto
scoreva el patoc
e l’acqua, che gheto
Fazevimo a gara
cussì per zogarse
de traversarlo
senza impantanarse
Ma iera logico
che ogni tanto
un finiva dentro
slavazà tuto quanto
“Ara che roba
no go cossa darte
sporco e bagnado
no se pol vardarte”
“Tien provisorio
metite questi
fin che se suga
cussì te se vesti”
“Ma nona no posso
meo star bagnà
xe vestiti de baba
quei che te me gà da…!!”