Ciapo el bus

ciacolando siora Iole
amicizia la ga fato
el veceto inveze no
el pensava al suo gato

braghe soto al cavaloto
ghe xe i muli che va scola
le cufiete nele 'rece
per i libri la cariola

meo guantarse sule curve
cori tropo 'sto sofèr
e che 'ncora no caschemo
sora in brazo a un passeger

-sior la vol forsi sentarse?
disi el mulo gentilmente
-coss'te pensi che son vecio
stago in pìe cussì te impari
ma coss'te se ga insognado?
-poco dopo un giramento
ben pulito tombolado

-compermesso devo scender
-si ma no la stia sburtar
-go le borse dela spesa
no volessi intrigar
-e la passi bon che vita
-ma perchè la xe rabiada
-siore basta ciacolar
la fermata xe za ndada

-go dolori, cervicale
la me seri el finestrin
-ma xe caldo semo in luglio
no se riva respirar
-la me lassi el celulare
-ma cossa la vol de mi?
-fra un do ore starò pezo
volerò telefonar
per vignir cussì trovarla
e poderme lamentar

xe l'autista che sa tuto
lui decidi la regia
basta che no ghe parlè
come scrivi la tabela
ma se go de domadarghe
lù xe dentro del gabioto
fazo gesti oltra el vetro

par de esser un scimioto

quà de noi obliterar
tanti ga interpretà
-ma se magna o se bevi?
-mi el biglieto go timbrà
cossa altro go de far
lori disi obliterar
...un veceto el ga dito
-forsi in bagno ghe vol ndar
ma  no essendoghe servizi
scendo quà e vado in bar

meo de esser in teatro
ogni giorno un'altra storia
e xe sempre roba vera
se te ciapi la coriera