No più de 100

...E dopo 23 anni de basket agonistico, come gavessi podudo no scriver dela bala a spichi, del cercio de fero e dela mitica redina...i ricordi xe tanti..misiadi ...co go cominciado mi el tiro da 3 iera solo nell'Nba (e semo comunque nel 1973)...se zogava coi calzetoni longhi, le braghette super atilade (per mostrar i muscoli??) e le canotiere che spizava....desso xe braghe ala pescatora (rigorosamente a vita bassa) e maiete senza manighe al posto dele canotiere, con soto le "belisime" maiete dela salute...le calze le xe, ma par che no le sia, de tanto curte che i le fa....una volta se te gavevi le converse bianche in tela te ieri ala moda...desso esisti air...nere, bianche, rosse....e mille altri nomi impronunciabili...ma ve asicuro mi che no dipendi dale scarpe....quela volta i alenadori (coach) i ciamava time out e i te dava tuto lori: sugamani, boracce, spray per le bote....desso i coach ciama time out e dala panca se alza masagiator, medico, acompagnator, vice coach, lavagnete, penarei....e il time out xe za finido....desso i se bati 5 anca se i ga subido un falo tremendo...quela volta i veci de squadra i te diseva "mona" e i gavessi volù baterte, ma sula testa...mi go comincià in ricreatorio: un istituzion per la nostra città che continua ancora ogi...Finida la scola, se no iera alenamento, in "ricre" te tiravi in canestro tuto el dopopranzo ...i zoghi iera sempre quei: giro del mondo e 21...e quel iera el meio alenamento (stile slavo "corri e tira") per le partide del sabato...el mio primo maestro de basket (si perchè guai ciamarlo coach) el ne portava a zogar de tuta l'altra parte dela cità a piedi disendo che iera un bon riscaldamento...e anche se vinzevimo tornavimo a piedi,(però co la coca-cola pagada) perchè el diseva che iera un'otima soluzion defaticante...e noi lo scoltavimo in religioso silenzio..però mi iero bastanza brontolon, ma ala fine del mio primo campionato (za che iero bastanza longo per la mia età...) go vinto la classifica marcatori e lui me fa: "visto, cussì desso te starà un poco zito!!!"... e come poderò mai dimenticarlo: xe sta una grande scola de vita per il nostro avenir, el ne ga insegnà l'amicizia e el spirito de squadra, del risultato no ghe fregava più de tanto, ma solo desso me rendo conto quanto el sia stado importante come omo.....e intanto caminavimo...uhhh se caminavimo....solo una roba no me xe mai ndada zo del suo modo de far: no'l ga mai voludo che segnassimo el punto numero 100...xe sucesso tantissime volte che rivavimo a 99 e tuti se vardava...sperando...ma lui niente...e semo verso i 12/13 anni...i altri alenadori che go avudo ( e che scriverò un'altra volta) nei anni seguenti i ne lassava andar oltre i 100...purtropo no capitava più tanto