26 gennaio 2012

La putela


"el mulo no ga voia de far del ben"....."e desso gavemo el secondo tempo: se
vinzemo 'ndemo ale finali juniores"..."no va, cussì no va"..."mi lo lasso in
panca"..."de solito el segna tanto, ogi però 1 su 9 de fora e xe solo el primo
tempo"..." per mi ghe ga da in testa quela putela"...."no pol una squadra
trovarse in dificoltà per un "mona qualunque"...Co go sentido ste parole in
spogliatoio (anzi nel bagno dei spogliatoi) ve digo la verità, che me ga girado
un fiatin i bisi, ma solo un fiatin, no più de tanto, iero bituado a sentir el
mio alenador parlar un poco grezo, ma quasi mai con mi......Son vignù fora del
bagno nerooooo e i me ga vardado un poco imbarazadi...volevo mandarli aff.....
ma go pensà che i gaveva za capido....son passà senza degnarli de altri sguardi
e son ndà a far riscaldamento...però a eser sincero in quel periodo gavevo in
testa la putela e mi me pareva de eser su una nuvola no de zogar basket...
Ripensandoghe, dopo più de 30 anni, forsi un poco de ragion i gaveva a dir quele
robe in spogliatoio...ma solo un poco eh....el basket xe sport de squadra e noi ierimo una squadra: ma mi de un per de partide fazevo pcohissimo per la squadra, al contrario del solito, iero come incandido...insempiado...sentivo i useleti...caminavo col soriso ebete in facia....co ghe go contà un giorno a mia mama me ricordo che ela me ga risposto decisa col suo solito soriseto: falla breve dei,  amor no xe pasta e fasoi, e pò el primo, xe robe de muleti !!! Ciapa e 
porta casa...
Se ricomincia, fis'cio del'arbitro,semo pronti, anzi i xe pronti perchè resto in panca...e me brusa, uhhhh se me brusa....
El secondo tempo va via veloce in equilibrio perfetto...ma mi no vegno rimesso in campo: l'alenador che tanto me gaveva voludo in quela squadra, sto giro me mostrava la schena...a 15 secondi dala fine però i ciama cambio...tocaa mi (go sempre pensà che i ga voludo punirme più del normale e cussì la beffa de zogar 15 secondi...e per cossa? ...per una putela...mah....entro....rubo bala a metà campo e me fiondo in area avversaria per tirar...subiso fallo....sona la sirena ...noooo...due tiri liberi a tempo scadudo...La prima e ultima volta che me saria capità....iera el massimo che podeva suceder....
e stavimo perdendo de un punto:....l'alendor me vien vizin
e con la sa solita "dolceza" me fa: ...pensa ala muleta cussì, forsi, te
segni...in un lampo sparidi useleti...nuvole...e insempiamenti vari...penso a
ela un atimo e buto dentro i due liberi...vitoriaaaa..se va a Treviso...coro
subito del' alenador...se abracemo e col mio solito caratere peverin ghe digo:
visto che el "mona" sto giro ve ga fato vinzer....tuto finisi in una ridada...e
xe sta giusto cussì!!....co la putela se gavemo lassà prima de 'ndar Treviso...
e la go sbaglià tantissimi tiri liberi..... No so dove la sia finida, no se
gavemo più rivisto....ma de sicuro sta nota xe per ela...ciao putela

20 gennaio 2012

Dotor, che mal!|


Ogi xe fila
e per no pagar dazio
desso ‘sto ganzo
el xe partì ben
tuti speta el dotor
ma chissà se'l vien

“Bongiorno a tuti
chi xe ultimo qua’?”

“Son mi” disi una

“Ah, per lei xe pecà”

“Come saria?”

“Xe che
pensavo de esser mi
che son ultimo rivà”

In sti posti la furia
a niente no servi
e ‘ncora meno
che ciapi i nervi

Pazienza ghe vol
no semo contenti
e proprio per quel
i ne ciama pazienti

L’informator scientifico
entra col borson
tuti sbara i oci

“e chi xe sto qua
e la dentro cossa el ga’?”


Disi siora Pina:
“El sarà ‘ssai malà
ara quante carte
che’l ga portà”

"Permesso permesso
go solo de ritirar"

"bon ma alora
no la stia entrar"


"la speti la fila
come tuti quanti"

"ma fazo veloce
vedo che se tanti"

"prego, la passi
àlo andemo
la vadi pur
ma cronometremo"

E cussì el sior
decidi de entrar
però ‘ndando dentro
el se riva intopar

Riva el 118
per ingrumarlo
e quel’altro sempre là
a cronometrarlo

Però in sta sala
‘tanto che te speti
vien fora de tuto
e ghe xe anca chi
se fa far la diagnosi
de quei che xe lì

E tra globuli rotti
e tricicli alti
vien fora strambezi
che no riva guarir
ma che fa ‘ssai rider
chi sta a sentir

E se te li scolti
tuti ‘sti pazienti
vien fora tratati
de anatomia
e i sa anca ben
de farmacia

Trope pirole
meo no cior
le sbusa el stomigo
ma passa el dolor

E se te ga tosse
va ben el siropo
e se no te vol
via co’l aerosol

La febre xe roba
che ga de sfogar
el giro de aria
meo no becar

E certi pazienti
fazendo casoto
decidi za’ lori
in sala d’aspeto

Ricovero urgente
o cassa maladi
quà svola le diagnosi
prima che visitadi

Però una volta
so de un dotor
a un che no la finiva
ghe ga dà el stetoscopio
“la meti anca el camice
prego la vegni
che mi me sposto
e cussì
la beca el mio posto”

“gaverò un dolor
sula punta del pie”

“Ma mi veramente
forsi no so
e po’ cossa c’entra,
...el vegnerà...
ma adesso
no la lo gà”

“No, no
intendevo
che me diolerà
per la piada nel cul
che la becherà!"

19 gennaio 2012

al volante


No xe problemi
chi te vol che ne fermi
xe un’autostrada
e po’ casomai
i fermerà prima
quei altri s’ciopai
mi no capisso
come se pol
andar controman
dopo el casel
e po’ mi digo
che fussi uno solo
inveze ara là
più de zento sarà

Che zima...


Per dir che xe fredo
de noi qua a Trieste
me casca la rima
disemo che zima

I gradi che cala
tuti imbacucadi
coverti de sciarpe
semo involtizadi

Biceri de vin
servi per scaldarse
però no esagerar
e no imbriagarse

Guanti e bereti
xe jazo per tera
e po’ co xe bora
che vadi in malora
Se te bati broche
anche i tui denti
co’ xe sotozero
no ridi contenti

Solo ‘sta ‘tento
a no far confusion
sior Pino un giorno
senza maion
come un ghiaciolo
casa tornando
una roba importante
stava dimenticando

Lo vedi l’amica
e la ghe disi:
“Sior Pino xe inverno
ma indove la iera?”


“No posso parlar
la vadi in malora”

“Ma cossa go fato
perché sta maniera?”

“Con tuta ‘sta zima
i denti batendo
la devi scusar:
ma la dentiera
go visto svolar”