Stando ziti No xe vero
che no xe niente de dir
tante volte no xe voia
no se vol farse capir
Opur anca zerte volte
no gavemo argomenti
e alora femo finta
de star liberi e contenti
Poco mal avanti tuta
senza oci per nissun
e convinti de far ben
scontentemo più de un
Ma se sa che le monàde
pian pianin le salta fora
e cussì in quela volta
riva giusto un va in malora
Xe ‘ssai meo lassar perder
la figura xe za fata
indrizar ‘sti brodi longhi
vien de novo una fritata
La xe pronta anca ‘ssai cota
e più volte ben girada
le parole ormai no servi
resta sempre una boiàda
E ‘ste robe ormai se sa
ga bisogno de fredar
perché desso prima roba
xe importante rispetar
La fiducia persa xe
e co’ più no te ghe credi
casca el palco e le monade
le va tute sparpagliade...