Omini e colori
che cori in braghete
babe lucicanti
ghe salta le tete
Meo zogar tenis
e co la racheta
la bala che cori
sicuro no speta
E dopo in spiagia
el mega torneo
noi se impegnemo
che 'nderà meo
La rede xe alta
che vadi in malora
e la caviglia
me fazo fora
No semo campioni
stemo più 'tenti
che fra i canestri
perdemo do denti
Mia moglie la disi
che son incoscente
i tui aversari
xe mularia
che ga ‘ssai rispeto
ma se i poderia
sa che gomitade
i te conzeria
I fioi più pici
che stava vardando
i ne ga dito
tuti zigando:
andè zogar carte
che almeno per quel
se zoga ogni parte
per voi xe più bel
e i più veci
pol andar 'vanti
anche un doman
co i ani xe tanti
In sela ala bici
el vizzin de casa
tapado a fogo
per lui xe un zogo
ma quei che lo vedi
co’l parti ingalado
ghe salta l’ocio
che’l xe ‘ssai colorado...
E po’ no se sa
quanta strada che’l fa
magari pian pian
e de scondon
el torna indrio
dopo el primo canton
Co’ i ocialini
sul brazo inganzadi
in piena estate
li vedemo smoiadi
i costumi più strani
vedemo sfilar
e co' i se buta
i ghe sta per cascar
Vien fredo e neve
ma i sportivi no mola
cussì in montagna
i fa sbrissar la siola
se xe quele del sci
va anca ben
ma se xe dele scarpe
no so chi li tien
de una culatada
a peso morto
che bota che mal
no me son gnanca corto
Scolteme però
tuti più tranquili
zogar a frecete
Opur coi birili
Perché anca col sci
se te va far fondo
dopo qualche chilometro
te diventi biondo
te se anebia la vista
no te me credi??
anche la Madona
zerte volte te vedi
Son mi el primo
lingua fin per tera
go risolto el problema
con bela maniera
Son 'ndado in zità
gò comprà una brandina
estate in spiaggia
d’inverno in cusina
Fazo ginastica
adominali
e la tartaruga
me xe vignuda
forsi però la iera malada
perchè a mi
la me resta girada