Tante volte fora in pergolo
me diverto a vardar
ghe xe tante robe strane
tuto intorno ricordar…
Xe la baba in braghe curte
che la meti a sugar
e più in là in canotiera
l’omo che la sta a cucar
Xe i muleti che se ziga
lori zoga a becarse
un drio l’altro i ciapini
i va ‘vanti a tirarse
“Per favor fazè silenzio,
che son vecia, voio dormir
che se no ve lavo tuti
la mastela vado impinir”
“Mi son primo per rigori”
la partida de balon…
desso xe tuto asfaltado
quela volta un polveron
e cussì anche el panin
el ciapava dela tera
buro, zucchero, marmelada
e una bula spolverada
El mureto soto casa,
po’ passadi un per de ani,
quante storie che ga visto
iera i primi fidanzai…
“ocio al pergolo,
i ve vedi
che voi due ve se basai”
Quante volte per zogarme
go sonado i campanei
“si, chi xe?” i rispondeva…
“dei filemo che xe meo”
…e ridendo se scampava
“Xe ‘ssai tardi, vien a casa”
“per favor zinque minuti
che finisso de zogar”…
“ndemo dei no sta far storie
che xe pronto de magnar”
Guardie e ladri o nascondin
chi ghe toca de star soto?
me nascondo in pineta
e nissun no me trovava
po’ col scuro tuti quanti
preocupai i me zercava
“ma sto mona in do’ xe ‘ndado?”
e mi beato fra le frasche
iero ben che indormenzado
El balon sula teraza
con un tiro xe finido
senza ‘ssai preocuparse
co’ la scala son andado
…e proprio quando lo ciolevo
se ga verto el rolè
el paron se ga sveiado
…fin che coro no me ciapè…
E ‘sto pergolo de picio
el gà visto ‘ssai matade
muleria desso cressuda
le ga tanto combinade
E quei zoghi no xe più
xe passadi tanti ani
ma dal ziel voi vedè tuto
robe bele e anca el bruto
Mi me giro ‘ncora desso
se de là voi me ciamè
…su quel pergolo no più…
nel mio cuor però restè!