Quel'ultimo muro

Quanti muri

tira su la gente
Quanti muri
che no servi gnente
Quanta rabia
trovarse oltre
Quanta voia
de saltar su
Quanto poco
che bastassi
E co' un sogno
tirarli zo'
Bel saria
sveiarse un giorno
Verzer i oci
pian pianin
Veder che
xe restado solo
El vecio muro
del Pedocin...

In cornise

sul mar le parole 

sburta ricordi
che i sguardi ingruma
e dismissia
squasi fussi un pitor
che in zima al molo
inventa le sue poesie
co'i colori dela zità
che lo sta a vardar...

Me inacorzo...

Bagolando per la zità
me inacorzo che rente
piaza Granda
el mar ghe fa grizoli al molo
e squasi'l sbisiga fra i nuvoli
zercando novi colori
per piturar de morbin
tuti i cantoni de Trieste
e me sveio vardando'l faro
pindolandome in un sogno...

Bandablandoso

Quel cicinin de matio
che se ciama morbin
Quel lassarse
trassinar dei giovani
Provarlo far
xe creder in lori
Rivarlo far xe incoragiarli
E lassarli cresser liberi
de esser se stessi...

ciao Trieste

E co' te se dismissi
ela te varda
el suo timido soriso
che sventola sul mar
I colori drio'l canton
che penela'l Carso
E in piaza Granda
squasi a caval
de un refolo
la te mola
xe Trieste in sogno
che saluda...

co' sufia

E co' xe bora
i pensieri svola
e co' la tira
soto e anca sora
e co' la sburta
che te camini
ocio sul molo
xe do' cretini
schizi de acqua
e un fià te cori
clabuk fa slalom
scoverzi i cuori
pitura'l mar 
altri colori
pastrocia tuto
sula zità
el triestin
ben sventolado
a volte'l disi
mi son bituà

Svola la bora

Co' riva un refolo
fa 'ssai rumor
Sentirlo dentro
dismissia'l cuor

Le robe sbrissa
svola lontan
I bei pensieri
te ciol per man

Rucando 'vanti
creder nel vento
Oci de muleto
rider contento

E se svolando
xe anche la bora
A scriver cantando
tuto la colora

E 'lora ela
in mezo al mar
La taca corer
confusionar

Refoli giovani
come'l doman
Sufia sui veci
un'emozion

Strenzi Trieste
fra Carso e mar
Co' la sua bora
che fa sognar...

rosso...

Emozioni sora'l mar
drio i nuvoli
Piturade co'i oci
de Trieste
ricordi che fa 
capriole sora
i nostri pensieri
E intanto'l sol
par 'sconderse
timido
squasi'l fussi davanti
al primo amor
A diventar rosso
come un tramonto...

canestro...

I sogni de realizar
xe come far canestro 
co' la luna...
Crederghe vol dir 
saltar piu' in alto 
per gramparla...

imagini...scrite...

...becar atimi...
Prima che un refolo
li sburti via...
Fotografarli e scriverli...