OCIO - 11 -

No se pol regalarlo come'l diamante, ma anche un mona xe per sempre

Squasi fussi un sogno

Sveiarse e verzer i oci
corendo rente'l ziel
xe ricordi che va.
'Corzerse che pol cambiar
più' svelto dei sogni,
fermarse a ciapar fia'...
Po' indormenzarse
per vardar el doman
squasi fussi un sogno
che te ciapa per man

OCIO - 21 -

Spiegarghe al mona 
sperando che'l capissi, 
xe come spiegarghe 
al caval a dondolo 
sperando che'l tachi corer

Par...

Trieste par piturada
col penel tociado 
nei colori dela sua bora...

Grufolando

Grufolando nei ricordi
ribaltando cassetini
tanti sogni salta fora
tuti ierimo putei...
Rente casa fra i portoni
ziga e scampa pien de fioi
divertindose con poco
se sonava i campanei...

puntini

Sognar no costa niente...
basta un canestro pien de emozioni...
una squadra giovane... 
con un cuor e una grinta che...
CIUFF

Sbianchizà

Veci che te conta
de quando iera fioi
come nuvoli a brazeto 
che svola lontan
a ingrumar ricordi
e un sufion
tuto sbianchiza
inverigola'l cuor
e quel che iera
xe'l futuro
e'l mondo 
se colora ancora...

pian pian

De 'sconton
el mar
scuminzia
scriver 
le parole
del'estate

Come una careza

Co vardo Trieste
'scolto ricordiche sbisiga,
bora color del ziel
che tramaca e scovercia
grufola'l mar e rugna sui scoi,
el castel par squasi
dismissiar la storia sua
e rente piaza Grande
el te conta fiabe,
tanto che svola un cocal
morbin refola sul molo,
e in tuto sto remitur
una careza inverigola
i mii sogni...

sentirse vardadi

Co' Trieste te varda
timido anche'l sol
diventa rosso