Son ‘ndado sicuro
su per le scale
e rente del muro
sentivo rumori
Go ‘verto la porta
e fra ragnatele
impizo la luce
e vedo le stele
Me casca in zuca
un do scatoloni
posadi sui travi
su quei mensoloni
La mia sofita
gà libri gà robe
no go mai lustrado
e in tuti ‘sti ani
no go mai zercado
Xe rivà el momento
de meter a posto
le robe più strane
lassù che dormiva
un quadro ‘ssai vecio
fazeva la mufa
un pochi de ordegni
e tanti biceri
ricordi e parole
no de l’altro ieri
eco nascosto
un grande baul
no rivo spostarlo
el ga un lucheto
E ‘pena lo toco
el taca sonar
le gambe de colpo
cominzia tremar
Cossa sarà?
quassù xe magia
chi sona la dentro?
La mia fantasia?
Lo rivo a verzer
comincio calmarme
ma la musicheta
xe sempre più forte
me torna in mente
de co’ iero picio
mia nona sempre
quassù me portava
e la musicheta
ela tacava
“Su varda picio
in alto le stele
xe quele vere
e te varda anca lore”
El carillon sona
el tempo che passa
lù conta le ore
anca dentro una cassa
E quando de grande
te lo troverà
ti daghe subito
una carigada
indrio nel tempo
nona xe tornada